يا صابر يا دزمة يا للي ما لكش لازمة

أيييييييييييه الحمد لله ؟ خلاص الصهاينة بطلوا محرقة غزة؟ خلاص هدوا اللعب عشان يستردوا أنفاسهم ؟
خلاص العسكري الأهبل اللي راكب على الدبابة الجاجوار ، طالع فرحان ورافع ايديه بعلامة النصر؟
لأنه استطاع أن يدك البيوت على الصبية الرضع والنسوة الحوامل ...
منتصر صح؟ أكيد ما هو ما دخلش حرب أصلا ...
وبرده حديك المكآفأة ...
بيفكروني باللعبة الكورة ، اللي ليه واللي مالوش واخد فلوس...
يعني الأمور هديت كده ورعرعت....

طيب ننام بقى شوية كده لحد ما اليهود يعلنوا الحرب تاني عشان أصوات الرضيع اللي في جنوب رفح وهو بيوأوأ
أفزع أفالهم الأبرياء اللي في شمال الدولة العبرية....

ولا تعالوا نرجع للشأن الداخلي ونشوف البلاوي اللي حصلت أثناء الحرب على غزة ...
أكيد حنلاقي ألف قانون وقانون طلع واتوافق عليه في مجلس الشعب...
أكيد حنلاقي قانون الملكية العامة أتوافق خلاص عليه ...
وخليني أتبحبح لي حبتين ...ما المدونة مدونتنا نرمح فيها كيف ما نحب...

أصل أنا لا أدري لماذا هذا القانون بالتحديد (اللي لازق) في حلقي وعصي على البلع ..
هذا القانون مفضاه _حلوة دي_ أن الشعب اللي هما سياتك يعني كل واحد حيكون معاه سهم بملكية حته في البلد ...
هذا ما قيل ...
ولأني مخي على قده ..فتخيلت مثلا أني أملك أصول ملكية متحف المجوهرات مثلاً _حيطلع من عيني_
يعني معاي سهم فيه ..وسهمين كمان في شارع عبد العزيز ....وحضرتك معاك كام سهم برضه لأماكن حلوة كده ...
طيب أنا من حقي البيع...؟
بمعنى آخر .. لو أن الدولة ملكت 55% كالعادة من أسهم أي ممتلكات اللي هي ملك للبلد كلها يعني ...وبعدين
فتح مخك معايا ...فرقت الباقي ع الغلابة اللي زينا
طيب أنا مستثمر أجنبي ..قالك ينفع يشتري ودا حينشط عجلة الحمار - آسفة الإستثمار_ اللي بقالها من يوم ما وعيت كده ع الدنيا وهي في الانعاش مش عارفين ننشطها ...
قوم ايه المستثمر دا يشترى مني ومنك لأن السهم حيعمله حوالي 150جنيه كده
يعني ألف مين حيبيع ...واللي مخدتهوش القرعة تاخده أم الشعور المسبسبة ..
عشان بعدها محدش يجي يقول الأرض والوطن لأ يا خبيب ماما
أنت بعتوا وأنا اشتريتوا ...فنيتوا خماس ...قصدي ..خلاص
الدار دارنا ...نرمح يها كيف ما نحب...وما فيهاش مشكلة الدولة ليها 55% يعني أكثر من نصف الملكية..على الورق
وبدافع دفع عجلة التنمية ...
وبما أني هبلة وبريالة ..من سال رواله ..لمحبي الكلمات المتقاطعة...
فأتخيل أننا 80مليون بس .. لو كل واحد خد نفس عمييييييييييييييييييك وجه عند طرف العجلة وقال بسم الله
حندفعها لحد الهند ...
يعني ممكن ببساطة ألاقي مجموعة مستثمرين فارضين اتاوه _رسوم لزوم أكل الخروف وحبل لربط الخروف وجردل لزوم أكل الخروف _ممكن ألاقيهم طالبين رسوم عشان أعدي من الشارع بتاعنا وادخل بيتنا ..
ومش بعيد تلاقوني حاطة يا بطة ...على عنيا البتاع بتاع بات مان ..ولابسة لبس الكات وومن ...ونازلة جري متخفية على سطوح بيتنا هاربة من شي ما..ألا وهو الإتاوة....
يا وقعة سودة دا ممكن الواد سووو يلم أسهم المعادي كلها ..ويرمينا في الشارع ...أو يفرض علينا علاوة عشان يقدر يربي أبنه أو بنته اللي فوق السطوح...
يعني ممكن البنت خيخة ..تخيخ وتعمل حركتها الخيخية في 6 اكتوبر اللعينة...وتقول وأنا مالي أنتا بعتوا خبيبي أنا أشتريتوا...
تفتكروا وقتها الصباغ ممكن يكوش على البورصة وما حولها ...؟!!
طب لو جت ع المدونين مقدور عليها ، بس يا وقعة ألوان لو رحت الهرم الصبح لقيت واحد خبيبي بقولي ممنوع دخول خضرتك...
ليه يا خواجة دا الهرم بتاعنا ...
لأ خبيبي الهرم دا بتاعنا أحنا أنت بعت انا اشتريتو خبيبي...
وبعدين تلاعب بقى وتزوير ملكية أسهم وبيع أراضي مملوكة للدولة _زي ما بيحصل دلوقتي ع الصحراوي
وتروح مننا الأرض ..
وبعدين اللي اشترى يعمل فيلم fiddler on the roof ونحاول ندور على وثائق تثبت حقنا في الأرض....
وترسخ في الأذهان عبارة ..أنت بعتو خبيبي أنا اشتريتو

مش عارفة ليه الموضوع دا بيفكرني بفيلم عاوز حقي لهاني رمزي
بس أحلى ما في الفيلم أن لما فاق الناس ما كانش عندها استعداد تفوق ...ولما سأل عصام كاريكا حنرفع علم مين ؟
خبيبي قالوا مش مهم خبيبي بيع الأول وبعدين نشوف حنرفع علم مين..............
ولما فاق صابر الناس كانت فقدت كل احساس بالوطنية ممكن يربطها بالأرض
وهتفوا وقالوا ...

يا صابر يا دزمة يا اللي ما لكش لازمة...
يا صابر يا حمار بيع لو حتى بألف دولار....

نامت حدوتة غزة...وفلسطين ...
وحتنام كمان حكاية القدس الإسلامية...
وحتنام فكرة الجهاد ...
وحتنام الجولان ...
والعراق ..
والشيشان ...
وحقها هي وأفغانستان....
وحينام حق الأسرى في 56
وفي 67 وفي 73 ....
وحينام حكاية دخول الصهيوني أرضي من الأراضي المحتلة لحد جنوب سيناء ..
بس بالبطاقة الشخصية...
وحتنام حدوتة المبيدات المسرطنة
اللي دخلت بفلوسنا ...
ومرضت أولادنا
وبعدها عملنالهم مستشفى سرطان الأطفال الجديد
بفلوسنا
عشان نعالجهم
وحتنام حدوتة الغاز...والبترول....
ومفاعل الضبعة بتاع 82
وحتنام حدوتة سوزان تميم ...
وأطفال الشوارع
والأغذية المسممة
والخضر ولفاكهة المهرمنة
والري بالصرف الصحي والمخلفات الآدمية
وحتنام حكاوي العشوائيات
واحنا بنتفرج علي حين مسخرة....
وحتنام حكاية الفسفور الأبيض..
والدايم ...
وحتنام حتى آثار غزة اللي اندكت
وحتنام حفاير الصهاينة في حائط المغاربة
في الأقصى
وحتنام حدوتة قناة البحر الميت
وحنهني بعض بالعام الجديد
واحنا بنتفرج على أزمة جديدة افتعلتها اسرائيل
في هضبة الحبشة
ايوه عند النهر الأزرق ومنابع نهر النيل
بحجة وجود صواريخ للقاعدة هناك
و...
هات البوست من أوله

ويا صابر يا دزمة يا للي مالكش لازمة.......