كيف كانت صغيرة وتصر على نطق اسمي باللام بدلاً من الراء ، وكانت كلمتها كفيلة أن توقظني من النوم ...
الوحيدة التي كانت تحتل قلبي في تلك الآونة....
صغيرة أنت يا هند...وجميلة ...اتذكرها الان بشعرها الأسود الفاحم...وعيونها السوداء الواسعة .. تقطر براءة ..
لهند معي ذكريات لا تنسي ولكن ما ذكرتني بها الآن ..أغنية كانت تقولها ... وهي حقاً معبرة بشكل كبير على حال مصر والأمة بشكل عام...
3 معالق ع السفرة
واحدة تزن ...
التانية ترن...
الثالثة تقول يا ماما...
عاوزة مكرونة ..
والمكرونة في النملية...
والنملية في العربية ....
و العربية عاوزة فلوس....
و الفلوس عند الفلاح ....
والفلاح عاوز تفاح....
و التفاح فوق الشجرة.....
والشجرة عاوزة ميه...
والميه في الحنفية....
والحنفيه مصدية...
و المشكلة معقادااااااااااااااة....
فعلا مصر أصبحت هكذا ...في آخر لقاء لد.زويل مع منى الشاذلي... قال لها: كل الوزراء بيشتكوا!
سبحان الله ...(طب) ما نتفق على شيء ..أقولكم ...
تعالوا نتفق نصلح الحنفية الأول...
مش الحنفية هي اللي مصدية ؟!!
وبكدا الجلدة بايظة ويمكن تكون بتسرب ميه كتير؟؟؟؟
زيها زي الموازنة العامة...اللي دايما فيها عجز...
طيب منتفق على أيقاف هذا النزف المتواصل للمال العام ...
نتفق على أبعاد كل واحد بيبعزق فلوسنا على وجهات نظر سيادته وهي مش صح ؟
نتفق إن بعض المحافظين والوزراء ...لازم يحاكم ..من وجه نظري بتهمه إهدار للمال العام ...
يا يحاكم ويطلع براءة ..ويكمل المشوار...
يا يحاكم ويتسجن ..
عدالة أهيه.....
ولما الحنفيه تبطل نزيف الأموال .. حنقدر نروي شجرة التفاح
وبكده الفلاح يبقى عنده فلوس يشتري العربية ، بدل ما يجي يشتغل مكسراتي شوارع ويبوظ الدنيا في المدن...
ولما نشتري العربية ... ونملأ النملية ...من قمح بلدنا ...حنقدر نعمل مكرونة من الدقيق الفاخر ...بدل ما ماما أمريكا منعت عنا القمح ... وحاشرة نفسها في كل كبيرة وصغيرة في البلد....
ولما نملأ النملية ويبقى فيها المكرونة
أعتقد أن المعلقة الثالثة حتبطل زن .....
وتريح دماغ ماما...
حد فهم حاجة ...!! بحبك يا هند
