كنت عاوزة أقول لها ...تريثيييييييييييييي....بلاش تهور...كنت عاوزة اقولها ...وجوده معاكم كان حيبقاله طعم تاني ....حتى لو كارهين بعض....
كنت عاوزة اقولها ..فكري قوى .. واحسبي للموقف دا مليون حساب ...فكري في ابنك ...لما يشتد بيه الحنين لأبوه ..فكرى ..حتقوليله ايه...
فكري قوي ..جداً...خاصة أنك بتحبيه وهو بيحبك ...ومش وحش قوى مع ابنه ...يعني بيحبه....
كان نفسي اقولها ...الست في بلدنا وفي وطنا العربي بتتولد عشان تضحي...
تقاليد مفروضة عليها ما أنزل الله بها من سلطان...
ممنوعات وقيود وضعها مجتمع لم يكلف نفسه عناء التفكر ليه أن محرم للست ومش العكس...؟!!!
مجتمع ...وقف عند كلمة عوان عندكم ...ومرضيش يفهمها ....ما رضيش يفهم أن الست دي ليها حق فيه ...مش بس هو اللي ليه حق فيها
زي ما أنت بتخرج مع صحابك وعندك وقت ..يا تخرجها معاك وتقعد مع زوجات صحابك...يا تاخدها تفسحها ....
سيبها تخرج لبيت الله ....تصاحب ستات من هناك ...
سيبها تحس أنك واثق فيها ..ما دامت اختك ومتابع سلوكها مبما يرضي الله وما دامت بنتك وربتها على خلق الإسلام ... وما دامت زوجتك واخترتها على أساس الدين وبعد استخارة الله ...
كان نفسي اقولها استني شوية ما تقطعيش شعرة معاوية اللي بينكم ..
بكره يكبر الولد ... وحتلاقي مليون سؤال جواه ... وحيرة ويمكن جرح ...غاير قوي...بعمق السنين اللي بعد فيها عن واحد فيكم عشان كان عايش مع التاني
كان نفسي اقولها ...فكري في نفسك كويس ..فكرى في المجتمع اللي انتي عايشة فيه ....فكرى حتقدري تتحملي بجد... ولا السكينة سرقتك ...
كان نفسي اقولها ...المجتمع مش جنة ...حتلاقي صاحبتك الحبيبة ..بعدت عشان خافت على جوزها منك...
خافت من الحسد على حياتها...
كان نفسي اقولها ...مهما كانت مواردك المالية ...حجم الانفاق مع كل يوم حيزيد...
كان نفسي اقولها ...بس فاجأتني بالخبر ...وساقت دلائل ...مقدرتش اتكلم وقتها ...
دلائل احترمتها ..مينفعش اعيش كدبة ..لمجرد أن الناس رافضة الحقيقة ....مينفعش اعيش في منطقة واقف فيها الزمن ...مش عارفة أنا النهاردة ولا امبارح ..معرفش الزمن ماشي بيا لقدام ولا بيرجع لورا ...
ما ينفعش اكدب على نفسي واقنعها أني بحب سجاني...بحب الراجل اللي واقف خلف الباب يحرسني من افكاري ومن نفسي ...ما ينفعش اقنع نفسي ان الرجل الوحيد الذي فتحت له بابي ..اغلقه وراءه لأنه مخوني وخايف حد تاني يدخل ...
مينفعش استمر في كدبة لمجرد شكلي في المجتمع ....
صح عندها حق مينفعش اعيش مع واحد يغتال الفكرة قبل أن تخرج لعقلي ...يمارس اقصى انواع الاحتكار ...مينفعش اعيش مع واحد متجمد فكريا ..او واحد متحرر لدرجة الجنون ...
كان نفسي اقولها اكتر من كده بس عرفت خبر الطلاق متأخر...
دلوقتي بقولها ...فكري قوي في اللي جاي ...فكري كويس ...
هناك 5 تعليقات:
تصدقى بالله
دى تانى مرة ادخل فيهامدونتك بالصدفة
وكنت ناسية اسمها لغاية ماشفت التدوينة الجميلة احكى ياشهرزادفافتكرت انى جيت قبل كده
اما بالنسبة للبوست الجديد
انا ادعى انى فهمت بتتكلمى على مين
انا معرفهاش غير من فترة قريبة من مدونتها بس
لكن حاسة ان قلبى واجعنى اوى من ساعة مافهمت الموضوع
انا شايفة ان النصائح ليها وقت وصاحب المشكلة هو الوحيد اللى ياخد القرار اللى يناسب ظروفه
بس بعد القرار حتى لو غلط
الدور الوحيد للناس القريبين منه هو المساندة وبس لغاية مايعدى من فترة الاضطراب اللى هيمر بيها
ربنا يصلح احوالنا جميعا
انا سعيدة انى اتعرفت على مدونتك
مش عارفة ااقول ايه
بس بيتهيالى انه خلاص
سبق السيف العزل زى ما بيقولى
بس حاسة انها مكنش ينفع تستمر
لان حياتها كانت هتبقى جحيم
على العموم ربنا ييسر ليها
الخير ويوفقها لما يحبه ويرضاه
وجايز هو يفوق ويعرف اخطائه
وتكون هناك فرص اخرى
والله خير معين
لقد خلقنا الله احرارا
زعلت والله عشانها
يعني وعشان ابنها كمان
كان نفسي يتربي بين الاتنين
بس هي ادرى بحياتها
ربنا يوفقها
وفرحت لن في ناس فهمت بوست احكي يا شهرزاد
اعتقد ان الفترة القادمة حيكون فيها بوستات كتر من النوع دا
تابعونا
او انتظرونا
ونورتونا والله
جزاكي الله خيرا
سميل روز
دايما منورانا ومساندانا
اعتقد ححتاج مساندتك في الفترة القادمة
يعني ناوية اخوض شوية خناقات على ما قسم
ربنا يسهل
دمتم بود
ربما هي نعمة...
قد يكون منع الشيء وسيلة لاسترجاعه للأبد
و قد يكون ذلك هو الاستقرار بعينه
ادعو لها بحياة هانئة
:)
تحياتي
إرسال تعليق