عاوزة اصرخ .. من الألم ...
عاوزة اخرج من ببببان الصمت ...
عاوزة اشخبط على الحيطان
عاوزة العب بعد العصاري ...
مع بنت الجيران...
عاوزة اهرب من انا
عاوزة اغير دنيتي
عوزة انشف دمعتي
عاوزة اهرب من انا
عاوزة الف الكون بحاله
من جنوبه لما لشماله
عاوزة ابطل اكون ضعيفة
أو ضحية
عاوزة ابطل اكون عبيطة
عوزة ناس تحبني
من غير ما تسأل مين أنا
عاوزة ناس تفتحلي قلبها
من غير ما تكسر قلبي انا
عوزة الاقي في يوم وطن
من غير ألم
من غير ضباب
يلف لون الورد
بلون الهباب
عاوزة الاقي في يوم أمل
يطلع عليه صباح
وبالليل ما يبقاش سراب
نفسي ألقى في يوم حبيب
يبقى الحياة بحلمها
ويبقى الوطن
ويصبح أمل
ميكونش هو ضلمتي
وسر ألمي وشكوتي
نفسي
ألاقي الكون بلون
غير كل ألوان العيون
لو ن جديد
من غير حديد
يقيد جذور الحلم للأرض البوار
نفسي في دموع الفرح
تروي الأرض اللي ماتت
والشجرة اللي مابقلهاش قرار
نفسي في عيون طيبة
تلمس قلوبنا
تحسها
وتطبطب عليها تضمها
تغسل همومها
وتروق دمها
نفسي في حاجات
لكن ساعات بتوه أنا
وأنسى أن أنا
أنا
وأن الوطن متغمس بطعم التراب
والورد لساه بلون الهباب
والأرض لساها بوار
والشجرماعادلوش قرار
يا نهار الوطن العجيب
بلاش تزود همنا
لسه جوانا كئيب
والأمل لساه غريب
والحلم لساه بعيد عن دربنا
ليست هناك تعليقات:
إرسال تعليق