أنا زعلانة ...زعلانة قوي...زعلانة من الناس اللي مش قادرة تصدق أنها جرحتني ...زعلانة من الناس اللي مش مصدقة أني تعبانة ... زعلانة من الناس في شغلي...دايما حاسين إني بتمارض عشان آخد أجازات ..
زعلانة من اللي قاعدة مستنية إني أمشي أو اطرد من شغلي عشان تحل محلي ...
زعلانة من صحاب الشغل ...زعلانة منهم قوي ...بعد البهدلة دي كلها ببساطة أول ما اتعب عاوزين يعملوا معايا زي خيل الحكومة ...
يعني بالذوق كده يا إما آجي الشغل وأنا بموت... يا أما العكننة عليا ونوريكي الوش الجبس ...ونهوشك بالإحتياطي...
الناس دي فاكرة ايه...هيه اللي متحكمة في ارزاق العباد؟ فاكرة أننا عبيد عندهم ؟ ما هو القطاع الخاص ما لوش كبير ..والحكومة مش عاوزة تعمل كبير لأنها مستفيدة يعني لما النهاردة الدولة تقول وفرنا 500ألف فرضة عمل بيقى جابوهم منين؟ من اللي اطردوا من القطاع الخاص ...
أنا زعلانة قوي ...زعلانة لأني حاسة بالألم اللي جوايا بيزيد...حاسة أن ما فيش حد حواليا..رغم أهلي ..أنا محتاجة أصحابي ...محتجاهم قوي...محتاجة أتكلم مع حد...محتاجة حد يقف جنبي...
لدرجة أني بقيت عاوزة أموت ... تعبت قوي من الدنيا دي...عاوزة مني ايه؟... أقنعة ولبست ...دموعي وكتمت..وجعي وداريته..ألمي وأتألمت لوحدي...ضيعت كتير قوي عشان مش عاوزة الناس تزعل...
دلوقتي كارهه الدنيا قوي ...يمكن لما كتبت شوية استريحت ....
بس بجد نفسي الاقي ءاخرللي بيحصل في مصر ...
هناك 3 تعليقات:
حبيبتى ماتزعليش
ماتتوقعيش خير من حد خلى املك فى ربنا كبير واعرفى ان محدش هياخد اكتر من نصيبه
وبعدين المواقف دى بتبين لنا معادن الناس وبتدينا خبرات كتير تخلينا اقوى على المواجهة
والف سلامة عليكى ويارب تكونى احسن
لو تحبى تفضفضى معايا ابعتيلى ايميلك وانا كلى اذان صاغية
حتى لو معرفتش اديكى حل او قدرت افيدك تاكدى انى هسمعك وممكن جدا اعيط معاكى
بس المناديل عليكى
خلاص ياقمر فكيها بقى محدش واخد منها حاجة
اقوللك قومى اتوضى وصلى ركعتين لله واكثرى من قول لا اله الا انت سبحانك انى كنت من الظالمين
وتاكدى بان الله معكى
ولو فيها غلاسة ياريت تقراى تدوينتى القديمة بعنوان"ماتزعليش"واعتبريها اهداء منى ليكى
يارب تكونى بخير وفى احسن صحة
ايه ده ايه ده!!!؟
الجميل زعلان بجد
مروة يا حبيبة قلبى .. انا ماشتغلتش فى حياتى كلها غير خمس اشهر وسبت الشغل .وكانوا كافيين انى اتأكد من اللى سمعته ان صعب جدا تعملى اصحاب فى الشغل
هناك تضارب مصالح
يعنى مش حتلاقى اللى يفكر فى مصلحتك انتى خاصة اذا كانت تعارض مصلحته الشخصية
طبعا الكلام ده مش عام
انت ممكن تلاقى ملايكة فى الشغل ..لكن دول نادرين
حاولى تفضفضى مع اصحابك الحقيقين
عارفة انتى ممكن تكتشفى فى العالم الافتراضى ناس كان مستحيل تتخيلى وجودهم فى الدنيا ..وتتمنى من قلبك لو كنتى عرفتيهم من زمان
صدقينى لسه فى ناس جميلة اوى
احلى حاجة عملتيها انك كتبتى وطلعتى اللى فى قلبك
وده معناه انك بتثقى فينا وبتلتمسى اصدقاء حقيقيين
وانا اتوسم فيكى صديقة جميلة..ويبقى حظى حلو لو حكيتيلى اللى مزعلك
مش حاقولك احسن من اللى قالتلهولك موناليزا الجميلة
سؤال بقى هام وحيوى
انتى متأكدة انك انتى د منوسى يعنى ابعتلك على ميل التاج
ولا يطلع حد تانى ؟؟
ردى عليا يا مرويتا بليييييييز
وطمنينى عليكى
واستعينى بالله
ربنا يريح بالك ويفك كربك
وهو وحده نعم المولى ونعم النصير
عارفه يا مروه
انا كنت شغال في منطقه اسمها شق التعبان
ومن اسمها كده باين انها حاجه يالهووووي ياجرعان
وكنت باشتغل في مصنع رخام .. مهندس على مكنه اسمها ووتر جيت .. وكنت باشتغل ورديه بالليل عشان في شغل كتير مستعجلين عليه
وفي يوم المكنه عطلت بالليل الساعه تلاته الفجر واتصلت بمهندس الصيانه ماردش علي وبالتالي قعدتي في المصنع مالهاش لازمه .. والمصنع في حته مقطوعه ولازم امشي بتاع اربعه كيلو في الخلا
وانا ماشي اتعرضت لحادثة تثبيت وتلاته رفعو علي سلاح وضربوني يسنجه في ايدي والحمدلله ماخدوش منني حاجه ولا موبيل ولا فلوس ولا اي مليم
بس عوروني في ايدي تمنتاشر غرزه
لما رحت بعدها بيومين المصنع وقلت لمديري عاللي حصل وقلتله ادي التقرير الطبي وادي المحضر واديتلو صورة من المحضر .. عارفه عمل ايه؟؟
انا غايب يومين .. وغياب اليوم من غير اذن بيتخصم يومين .. ده راح خصملي يومين بس
!!!!!!!!!!
يعني حتى ما هانش عليه يقوللي ولا يهمك والمهم انك تبقى كويس ومش عارف ايه
لأ
برضه خصملي اليومين
في لحظتها رحت كاتب استقاله وراميه في وشه
الجميل في الموضوع اني شفته بعدها بكام شهر ماشي في الشارع .. رحت ماسكه ونازل فيه تهزيئ ومسخرت بكرامته الارض .. ولا قدر يفتح بقو معايا
هي دي مصر للاسف
اللي مالوش ضهر .. ينضرب على قفاه
هتتصلح امتى
علمها عند الله
بس كل اللي اعرفه
ان ربنا هو الرزاق .. وان ربنا مافيش اكرم منه
ربنا يسعدك ويكرمك ويبسطك ويوفقك ويرضيكي دنيا وآخره يارب
سلامووووووووووز
إرسال تعليق