أنا بنت هوهو

ومن النوع الواطي كمان أمال أيه... يعني مش كلب بيوت لأ.. دا كلب شوارع كمان

سواق التاكسي يشتمني

مديري يطهقني في عيشتي

الناس اللي بنتعامل معاهم دايما ما وصلهمش الفاكسات

ولما تسأل الناس اللي ع الفاكسات يقول لحضرتك وصل يا فندم

مديرتي تقوم مستلماني كلام من الي قلبك يحبه ما أصل انا ملطشه

مش بقولكم أنا بنت كلب

ومش مكسوفة أقولها لأن الكلب هو اللي دايما صاحبه يسكعه على قفاه وهو دايب في دباديب صاحبه
لما صاحبه يمرض .. يقعد هو جنبه حزين ... مش دا اللي كان موريك الويل وسواد كلاب الليل ؟
لكن على الناس الغريبة أسد جبار .. أهو أنا كده
حاسة اني عاملة زي التور اللي ربطوه في ساقية
قال ويقول هو بس خطوه وخطوه كمان يا أوصل نهاية الطريق يا البير يجف ...عجبي (صلاح جاهين)

ساعات ببقى حاسة الدنيا ضيقة قوي ومن كتير ما هي ضيقة مش سايعاني
ساعات ابقى عاوزة اكتب حاجات كتير..لكن ألملم اوراقي وأمشي مقدش من وجع الكلام اكتب
من الشغل للبيت ومن البيت للشغل
تقدروا تقولوا ست مشغولة وحيدة جدا ...
مشغولة قوي في شغلي وف بيتي مش شغل من اللي بالكم فيه يعني شقا من غسيل وطبيخ
لأ مشغولة بمشاكل البيت واللي في البيت
ومشاكل الشغل واللي ييجي من الشغل
مش لا قية وقت لنفسي امبارح قعدت مع نفسي لوحدي .. حسيت قد ايه نفسي وحشاني
مكنتش لاقيه وقت افكر في حياتي في حالي
..................مش بقولكم انا وحيدة مشغولة جدا