23‏/6‏/2008

مشغلولة حبتين
اشوفكم في الملتقي إن شاء الله الجمعة القادمة
للبنانييت اللي جايين من بره اسكندرية والا اللي جوه ويحبوا نتواصل مع بعض ابعتولي على البرايفيت ميل
حبعتلكم رقم تليفوني

20‏/6‏/2008

إمرأة من زمن الحب

إمرأة من زمن الحب ...هي إحدى المدونات التي عرفتها اليوم... في محاولة مني للهروب من أحاسيس الشجن التي اجتاحتني ..هربت كعادتي إلى المدونات ...
فاجأتني إمرأة من زمن الحب ....بما خشيت قوله طوال فيما مضى....
من يعرفني يعرف جيداً ...أني أتميز بشجن وحنين تضج بي كتاباتي ... حاولت كثيراً أن أخفيه تحت قناع الضحك والكتابات المسلية أحياناً ...و الصادمة أحياناً أخرى ...لكنها تخفى ما أعانية من شجن في كتاباتي....
فجرت بداخلي ذلك المارد النائم ....كتاباتها قالت ما احتويه... هل يعني هذا أن قد اغير لهجتي في الكتابة...من الممكن ومن الممكن لا...لا أدرى .....لكني اعلم أنها ايقظتني وفتحت لي نافذاً على نفسي...
http://shahrazad2009.blogspot.com/

19‏/6‏/2008

لقاء المدونين الكبير بالاسكندرية

الدعوة دي وصلتني من عميد المدونيين أحمد الصباغ ...كنت طلبت منه عمل اجتماع للمدونين في الاسكندرية ...ومشكورا تفضل بتلبيه الرجاء...شكرا خالو احمد وعلى وعد باللقاء بإذن الرحمن التفاصيل كما وردتني :
فى مدينة الاسكندرية ..
ارض الثغر الجميل .. أرض الجمال .. ونسيم البحر الرائع
يتشرف الصالون بدعوة كل مدونى مصر لحضور لقاء المدونين الكبير بالاسكندرية
والهدف الاساسى للقاء هو التواصل وخلق مساحات ود وتعارف بين مجموعة من خيرة شباب مصر
الموضوعات المقترحة لمناقشتها فى اللقاء
دردشة عن التدوين وأهميته للمجتمع المصري
التدوين والصحافة
التدوين و ارتباطه بالفنون الأخرى
التدوين و السياسة البداية و النضوج - تجارب المدونين
ظاهرة طبع المدونات
هل يجب أن يكون للمدونة رؤية متميزة ؟
التدوين و الاختراق الأمني
أكثر المدونات شعبية و موضوعاتها
برجاء عدم التردد فى ارسال اى اقتراح او مداخلة
الزمان
يوم 27/6/2008 الجمعةالساعة 2 ظهرا
المكان رقم 345 ميامى 6 ش جمال عبدالناصر - عمارات التعمير - برج الأميرة - أعلى شركة الشرق للتأمين
أمام أسواق الشريف ----العصافرة / الإسكندرية
تحيات احمد الصباغ

15‏/6‏/2008

RONAN KEATINGكان يوم يوم ماسمعتك

Sometimes late at nightI
lie awake and watch her sleeping
She''s lost in peaceful dreams
So I turn out the lights and lay there in the dark
And the thought crosses my mind
If I never wake up in the morning
Would she ever doubt the way I feelAbout her in my heart
أنا كان مالي ومال عم رونان كيتينج ...أنا كنت خاصمت الرومانسية من زمان ... الله يهديه ..أنا أساسا مش بسمع أغاني ....
لكن عم الانستراكتور بتاع كورس العنجليزي اللي أنا باخده ... سمعنا أغنية Sway وأنا بدور على كلمات الأغاني...لقيت أغنية عم رونان في youtupe وعينك ما تشوف اللي فيونكات وردي وقلوب حمرا ...لأ مش عيد الحب يا فالح منك له..لأ... دي حالة حنين ...حنين مر شوية...حنين نابع من حالة تنتابني من حين لآخر النهاردة وانا بسمع كلمات الأغاني دي...حسيت بحالة من الحب تجتاحنى ... تعصف بي...حالة زودها أني وأنا مروحة شفت اتيليه حاطط فساتين زفاف مالهاش حل .......أنا بس عارفة اني في حالة حنين ممزوج بشجن ....
اللي يعرف الانستراكتور بتاعي يشوف شغله معاه ... أنا يشغلي sway أنا؟ .... هو ايه أحمد الصباغ والانستراكتور والاتيليه ... كلكوا حلااااايااا ولا ايييييييه؟ ...
مفضى الموضوع...والمستفاد من اللي فات.....
- اوعاك تسمع sway with me أو الاغنية السابق ذكرها لرونان كيتن .
- اوعاك تسمع كلام الانستراكتور بتاعك.
-اوعاك تسمع أغاني .
- اوعاك تشوف اي حاجة ليها علاقة بالرومانسية إلا لو كنتوا متجوزين هات لمراتك وردة حمرا ع طول.. وانتي حالتيلوه بجامة...ما جبتيهاش حمرا ليه يا زوزو...
- أوعي ..للبنات ...تمشي من جنب اي اتيليه خصوصا اللي قرب الكورس بتاعك.
-احذري الاتيليها وابتعدي عن أي ألوان بيضاء ...
- المقاومة لا تفيد ...وما أخذ بالقوة لا يسترد إلا بالقوة....قاطعوا الاتيليه...
- ابعدوا عن قناة س للمسلسلات لأنها بتجيب مسلسلات سوري رومانتيكية ع الآخر...
- ارفعوا معي شعار لا للرومانسية....
- كفاية كدا ألا انا شاكلي خدت دور رومانسية...

12‏/6‏/2008

أنا زعلانة

أنا زعلانة ...زعلانة قوي...زعلانة من الناس اللي مش قادرة تصدق أنها جرحتني ...زعلانة من الناس اللي مش مصدقة أني تعبانة ... زعلانة من الناس في شغلي...دايما حاسين إني بتمارض عشان آخد أجازات ..
زعلانة من اللي قاعدة مستنية إني أمشي أو اطرد من شغلي عشان تحل محلي ...
زعلانة من صحاب الشغل ...زعلانة منهم قوي ...بعد البهدلة دي كلها ببساطة أول ما اتعب عاوزين يعملوا معايا زي خيل الحكومة ...
يعني بالذوق كده يا إما آجي الشغل وأنا بموت... يا أما العكننة عليا ونوريكي الوش الجبس ...ونهوشك بالإحتياطي...
الناس دي فاكرة ايه...هيه اللي متحكمة في ارزاق العباد؟ فاكرة أننا عبيد عندهم ؟ ما هو القطاع الخاص ما لوش كبير ..والحكومة مش عاوزة تعمل كبير لأنها مستفيدة يعني لما النهاردة الدولة تقول وفرنا 500ألف فرضة عمل بيقى جابوهم منين؟ من اللي اطردوا من القطاع الخاص ...
أنا زعلانة قوي ...زعلانة لأني حاسة بالألم اللي جوايا بيزيد...حاسة أن ما فيش حد حواليا..رغم أهلي ..أنا محتاجة أصحابي ...محتجاهم قوي...محتاجة أتكلم مع حد...محتاجة حد يقف جنبي...
لدرجة أني بقيت عاوزة أموت ... تعبت قوي من الدنيا دي...عاوزة مني ايه؟... أقنعة ولبست ...دموعي وكتمت..وجعي وداريته..ألمي وأتألمت لوحدي...ضيعت كتير قوي عشان مش عاوزة الناس تزعل...
دلوقتي كارهه الدنيا قوي ...يمكن لما كتبت شوية استريحت ....
بس بجد نفسي الاقي ءاخرللي بيحصل في مصر ...

3‏/6‏/2008

كله في الكليتش حضرتك....كلشن كان....

وفيلم " الريس عمر حرب " وتدور احداثه داخل" كازينو للقمار " لنكتشف ان هذا العالم ما هو الا صورة مصغرة من الحياة التي نعيشها في عالمنا .. صراع الخير والشر ..شهوة الربح..شهوة الجنس .. البقاء للأقوى ؛
وفيلم "كباريه" نفس الحدوته برضك في كباريه وقصص حب وجنس وستات عاريات ورجال منفلتين جنسياً ... وشواذ وفقر أدى لكل ده
فيلم حين ميسرة .. نفس الشيء ...مجتمع فقير عشوائي متخبط الستات متحرش بهم من المحارم ...الستات عاريات وشواذ ..مثليات ... رجال على نفس الشاكلة ... أو متعطشين للزنا بكل أنواعه والموبقات بكل أشكالها.....
فيلم هي فوضي .... كباريه شوارعي يعني حينما يتحول الشارع إلى غابة كبيرة ....شوية قصص حب منحرفة وشواذ على شوية اغتصاب وتعذيب وحبة ملتحيين...وبقت فوضي لحد انهم معرفوش يلموا الفيلم وسعت منهم قوى...
فيلم الغابة...نفس القصة ولاد الشوارع اغتصاب وعلاقات محرمة ومشاهد مخلة ...وشوية بلطجة على اي حاجة ....
فيلم بنات وموتوسيكلات ... بنات عاريات ... شباب عاريين...موتوسكلات ...Any Given Sunday
هو نفس الفيلم ده بتاع آل باتشينو ....ربنا يستر وما يبقاش فيه المناظر اللي كانت في الفيلم
فيلم احنا اتقابلنا قبل كده ....واحدة عاوزة تخون جوزها عشان تنتقم منه ... الاعلان فاضح لوحدة ... وفي تلك الحالة بيكون اما أن الفيلم لا يحتوى على مشاهد كثيرة من هذا النوع والاعلان دعاية بس...أو أن ما خفي كان اعظم وهذا ما يرجحه كلمة للكبار فقط ...
مشاهد خارجة لنفس التيمة شهوات من كل النواع متأججة ..متاحة ... مستباحة ومقبولة اجتماعيا....
أنا ليه كتبت الكلام اللي فات دا كله؟ لأني عاوزة اقول شوية تعليقات على اللي فات من مهازل مش افلام.
- جميع الأفلام نفس التيمة...يعني لو عاوز تعمل فيلم ...المقادير اهه... بنت فقيرة ...بتصرف على اهلها ..أب سكري..أو أخ عاطل...أو زوج مدمن... مع التغيير والتبديل ما بين الثلاثة عناصر ....شغله في محل وا ما شابه ... تجاوز أخلاقي من صاحب المحل .. أو من زوج الأم أو من أي محرم وخلاص..لزم تشويه صورة العائلة عشان نحصل بره...اللجوء للشارع كملجأ في نظر المغلوبة على أمها آمن ...اعتداء ..السقوط في بئر سبع ..عفوا في بئر الرذيلة ...(على أساس ان مافيش جمعيات أهلية حارقة قلبها وجوامع واشخاص مستقليين وحزب وطني بالمرة عشان ما تتقفلش المدونة -كل هؤلاء يهتمون لحال الفقراء والمطحونين ....)
تتعرف على واحد بلطجي ...ا وحبيب المهم انها تعيش معه بلا صفة زواج ...ونحط بقى شوية سياسة من ان واحد من الظباط تعدى حدوده معاها على أساس انها حلوة ومطمع وبنت ليل وملهاش حد يدافع عنها ... وشوية ظلم على واحد ملتحي شافها ضربها عشان مش لابسة هدومها ... عنده حق... يجي الضابط اللي فات يعتقل الملتحي الي لفات برضك عشان البنت الفقيرة وبعدين يحصل اللي حصل .. وطبعا شوية تعذيب سادي للملتحي ورفاقه وشوية مظاهرات اخوانية على حبة ضرب فيهم وشوية شتيمة في الحكومة عشان يبقى الفيلم بيدافع عن حرية المجتمع - تقريبا حريته في الانفلات- ويبقى الفيلم اتبرأ من تهمه الانتساب أو التماحيك في الحكومة ....
وممكن تحط كمان تيمة رجل الاعمال الفاسد ....اللي طايح رشاوي في الكبير والصغير...ةتعلقه بالبنت الفقيرة ويحبها على مراته ويتجوزها عرفي كمان عشان ينشلها من الفقر ...وبعدين ... يا اما نهاية مفتوحة وسودة وكالحة السواد...اما النهاية الطبيعية .... الشرير وقع في البير ...
- يحضرني مقولة ل"برنارد شو" : حينما لام عليه أحد الأدباء تكلمه وبحثه في كتاباته عن المال...في حين أن الأول يتكلم عن الأخلاق...شو رد بأن كل واحد يتكلم عن ما ينقصه ...
الكلمة دي خلتني أفوق شويه من جو الاحباط من كمية الأفلام المنحلة دي...دا معناه أن اللي بعمل الأفلام دي ...بيتكلم عن ما ينقصه يعني الانحلال ده ... يبقى نوعا ما احنا لسه ما وصلناش لهذه المرحلة من التدني الأخلاقي وجرائم الشرف ...
- الحل ليس أبدا بفتش العيوب وكشف المستور ... يعني ما ينفعش اجيب واحدة رقاصة ...وجميلة وحلوة وغنية في مجتمع فقير زينا يستبيح تلك الأمور ويستصيغها وأقوله الرقص عيب واشاور له ع الرقاصة دي...
ما ينفعش أجيب بنت زي اللي فاتت واتعاطف معاها وهي تحترف البغي ..عفانا الله وإياكم...
- عيب قوي نقيب الممثلين يعمل الضجة دي على الممثلات الغير مصريات ..ويترك الرقابة تبيح تلك الأفلام .. بحجة الحرية ...الحرية - ودي كلمة قرأتها عن أحد المدونين- هي أن تقف بحريتك عند أعتاب حرية الآخرين
يعني انت حر تمارس الرذيلة ربنا شايفك ويعافيك ... بس مش حر تمارسها قدامي في الشارع ولا في التليفزيون ..مش من حقك تفسد اخلاق بناتي وولادي ... مش من حقك تخلي القدوة ... أمثال هؤلاء ..
- مش من حقك تحبسني عشان بقول ربي الله وماتحاكمش اللي بقول ربي غير الله...أعوذ بالله...
- مش من حقك تحتفل ببغيك على الشاشات وتقول دا فن لأ...على رأي د...عمر عبد الكافي دا فحش..بضم الفاء
والتفاحش اننا نتناقل الأخبار عن هؤلاء المخربين بالايجاب ...وعدم التمعر...اللهم إرزقنا أن تتمعر وجوهنا لما تكره وحرم علينا حرماتك يا الله
- وأخيرا وآخرا حديث سيد المرسلين يلخص كل ما مضى ..ولتعلموا لما آل حالنا لما آل
عن ابن عمر -رضي الله عنهما- قال: أقبل علينا رسول الله -صلى الله عليه وسلم- فقال : (( يا معشر المهاجرين ، خمس خصال إذا ابتليتم بهن وأعوذ بالله أن تدركوهن لم تظهر الفاحشة في قوم قط حتى يعلنوا بها إلا فشا فيهم الطاعون والأوجاع التي لم تكن مضت في أسلافهم الذين مضوا ولم ينقصوا المكيال والميزان إلا أخذوا بالسنين وشدة المؤنة وجور السلطان عليهم ولم يمنعوا زكاة أموالهم إلا منعوا القطر من السماء ولولا البهائم لم يمطروا ولم ينقضوا عهد الله وعهد رسوله إلا سلط الله عليهم عدوا من غيرهم فأخذوا بعض ما في أيديهم وما لم تحكم أئمتهم بكتاب الله تعالى ويتخيروا فيما أنزل الله إلا جعل الله بأسهم بينهم ))

2‏/6‏/2008

السيدة الفاضلة


صورة 1
ممثلة مشهورة ظهرت باحد البرامج ومعاها جوزها الظريف ....الحلوة كانت لابسة شورت اي والله شورت والكادة بقه يا با العمدة أناه حاطة رجل على رجل ...قوم ايه ....مش عوزة نباهه
البيه المحترم قاعدة جنبها متيس على الآخر ... خدت من اديه الرموت وهو برضك على نفس الوضع
***********************************************************************
صورة 2
انا اتكلمت عليها قبل كده ويكفي اني اقولكم انها من استار اكاديمي
**********************************************************************
صورة 3
المحجبات ممنوعين من الظهور في القنوات الفضائية المصرية الحكومية الخاصة ماشي ....
**********************************************************************
صورة 4
كل الاعلانات اللي بتظهر فيها الست المصرية بتظهر يا اما هبلة وفي الريف ومش عارفة تطلع بجعة الشيكولاتة من بدلة الظابط بتاعه ابنها ... يا أما الست المصرية السمبتيك اللي شعرها سايح ونايح ومكياجها متظبط ولا بسه طقم بلوزة قصيرة عل بنطلون ملزق لزم الشكاكة ووواقفة فين.....صح في المطبخ
*************************************************************************
صورة 5
ندرة العنصر الذكوري في الاعلانات ملحوظ بشكل كبير في الفترة الأخيرة ....يمكن راحو مع اللي راحو في 73؟
والاغرب تواجد العناصر النسائية في اعلانات اطارات السيارات وماكينات الحلاقة الرجالي ...واعلانات البنوك والشركات ... واعلانات القرى السياحية ...
***********************************************************************
صورة 6
دي بقى بمناسبة القرى السياحية ...واضح ان اسمها مشتق من كلمة سياحة والسياحة باللغة الدارجة هي الجرس بضم الجيم وفتح الراء ... بحث كل اعلان تظهر فيه واحدة هدومها مسروقة منها ...والتانية لسه مولودة حالاً دلوقتي...
والتالثة في الحمام والرابعة ع الحيطة ايو مبتشوفوش الحيطة في الفيديو كليبات عامل مهم ومؤثر ازاي ....على اساس انهم بيغنوا للحيطة ...والخامسة ماشية منطلقة والانطلاق هو الانطلاق خارج الملابس الخنقة يا خويا يعني احنا اتولدنا من بطون امهاتنا بالهدوم ... اخلع اخلع ربنا يخفيك شر الخلع...واخلع قبل ما تتخلع ...
************************************************************************
مما سبق يتضح جلياً ان كلمة السيدة الفاضلة اتعملت عشانا وان اللي قالها كان قاصد الستات دول ...
اللي عاوز يبجل واحدة ... يقول السيدة الفضلى مش الفاضلة ... الأخيرة جاية من بقايا الشيء ...
و في مصرنا المحترمة مش بس بقايا لأ ب...ايا ... رحمتك بينا يا رب ......