هاتوا الفلوس اللي عليكوا

تحديث:
واضح أن الرجالة مطنشين فمحدش علق ع البوست دا
طب الستات راحو فين ؟ واضح كده انهم خدو علقه محترمة عشان يبطلوا يقولولهم هاتوا الفلوس اللي عليكو



زرغطي يا بنت منك ليها ....
خبر عاجل ....
في بريد الاهرام واحد باعت بيقول دراسة بريطانية اتعملت عن شغل المرأة في البيت
الست بيت يعني لو قدرنا عملها يطلع بكام ؟؟؟
اللي كتب في بريد الاهرام بقول أنه بالمصري يعمل 230ألف جنيه
تعالوا نحسبها سوا
لو جبت شغالة في البيت تنضفلك البيت كل يوم حتدفع كام = 400جنيه بالميت
الشغالة مش حتطبخ لسياتك
تجيب طباخة = بالميت 200جنيه كمان يمكن اكتر
مربية أطفال (دادة يعني) =600جنيه في الشهر
مذاكرة الاولاد
ودي لوحدها حكاية طلع الالة الحاسبة منك ليه ... ايون حضرتك حتعملي فيها مش سامع
ان ما كنت ارفع عليكوا قضية واخد الفلوس ديي من حبابي عنيكو
احسب بنقول ايوه كده
لو عندك طفل واحد في ابتدائي حياخد درس
عربي 25جنيه + حساب 25 جنيه دا بالميت يعني+ علوم ودراسات زيهم 25
يعني المجموع 75 + الانجليزي 30قول 100جنيه
لو حضرتكم عندك ولد كمان في ابتدائي زيه يبقى 200
ول اعدادي يبقى الموضوع مختلف
يعني قول الدروس تدخلك في 300جنيه ما انا عارفة انكوا كده كده بتدفعوا للمدرسين بس تفرق لو الأم مش بتابع الواد المفعوص بيسقط ... .................ما علينا
تعالوا نحسب التوتل كده يا شباب
1- 400شغالة
2-200طباخة
3-مربية 600
4-دروس خصوصية 400
5- نسيت اجرة الطبيب اللي أمهاتنا بتقوم بيها وبتوفرلك تمن المستشفي اللي ممكن تحجز ابنك فيها والليلة 100جنيه يا معلم يعني لو ابنك تعب واحتاج رعاية 5أيام في المستشفى في الشهر كله يعني 500 جنيه
يعن حوالي 2500جنيه في الشهر
دا غير لا مواخذة سعاتك وكلك نظر من لبسك ومكوتك أنت والعيال وترقيع شرابات سيادتكم وتهنين حضراتكم اللي لا يقدر بثمن
يعني الست المفعوصة اللي عمال تنغص عليها حياتها وأنها قاعدة لا شغلة ولا مشغلة بتوفر على سعادتك مرتب قول شهر شهرين 2500جنيه يا مؤمن
ستااااااااااااااات هجوم
بقى كده يا راجل منك له فين الفلوس اللي عليكو؟ مش كفاية واكلين حقنا لا وكمان عاملين انكوا بتشقوا علينا وبتتعبوا
يا خي روح منك له لولانا ما طاب لكوا عيش ولا بتنجانة
طلع يا خي منك له 2500جنيه يا بلاش غلبة اللي محاكم الخلع على قفا مين يشيل
هزرنا نضحك بقه شوية
بجد الراجل اللي مش مقدر تعب مراته وقرا البوست دا المقصود منه انك تقدر مراتك بتتعب عشانك قد ايه
انا ما ليش دعوة باللي عندها غسالة وشغالة وطباخة وواحدة بدالها كمان انا بتكلم على الطبقة المتوسطة اللي معظمنا منها
يعني مافيش داعي تدخل لاوي بوزك للست الغلبانة اللي طافحة الدم عشان مديرك قارفك في الشغل ما هو كمان هي شايلة عنك قرب العيال وبلاويهم وعملالك سكرتيرة فكريني اكلم فلان ابقى جيبي هدية لعلان وهي ماشية وراك حاضر حاضر...ماتروحيش لأمك النهاردة ماليش مزاج .. حاضر يا ابن ...عمري
النهاردة دعوة انك تفكر مرة لو قدت 3 أيام في البيت ممكن يجرالك ايه ؟ حتقدر وقتها انها بتتعب ابنك اللي لو غفلت عنه دقيقة ممكن يموت نفسة ويولع البيت كمان بتجري وراه ليل نهار ويقلقها من أحلى نومة وتاخد اودة تانية عشان راحتك أنت ...أنت بس
فكرت في يوم من الايام انها اختارتك انت وفضلتك انت عن ناس يمكن كانوا احسن منك كتير ؟ فكرت انها تعبانة وشايلة عنك هموم البيت وانك لما بتترمي في حضنها بتخبي عليك تعب نهارها وقلقها وخوفها من اللي جاي .. يمكن كمان بتخبي عليك زعلها
تفتكر هي بتعمل كل ده ليه ؟ عشان بتحب مصر ؟ بتعملوا من قلبها عشانك انت عشان انت ساكن قلبها هي بتحبك لوحدك بعيوبك بمميزاتك
مش شايفة في حياتها راجل غيرك ..عمرها ما بصت لواحد تاني غيرك مع انك ممكن تكون لا مؤاخذة بصباص
النهاردة محدش ينام يا رجالة الا لما يقول لمراته بحبك ويعملها اي حاجة بتحبها يعني حاجة صغيرة حتى لو بوسة على خدها ووردة ولا باكو شيكولاتة وتقولها انا عارف انك بتتعبي قد ايه عمري ما حقدر اوفيلك جمايلك عليا .. كلمتين بكش في اونطة من بتوعكوا دول يا رجالة
وشوف مراتك حتتغير ازاي اللي كانت زهقانة من البيت والعيال ومن حضرتك حتلاقيها عاوزة تشيل الدنيا شيل
يا بني الكلمة الطيبة صدقة مع اي حد اشحالة من اهل بيتك ....
..........
ماذا وإلا ....هاتوا الفلوس اللي عليكوا

أنا جميلة ...



بهذا الكلمة ترد عيك كل من تسألها عن فتي أحلامها فتطالعك بقائمة لا تنتهي من الوسامة والشياكة والفيلا والعربية والفرح اللي هوه...فتفغر فاهك ...

فترد المحروسة انا جميلة ...

******************************************************

مع ان الجمال شيء نسبي

يعني بعض الناس ترى ليلى مراد او ليلى فوزي من أجمل الجميلات ...

في حين ارى أنا جمال ليلى فوزي باهت ومنحوت...

يرى البعض شرين آه يا ليل...جملة وتتسارع البنات في تقليدها...

في حين يراها البعض عادية جدا ...ومش بتاعت الكلام دا...

إذا الجمال شيء نسبي ... فاحيانا نجد الأمريكي الوسيم جدا متزوج من الست السمرا وشايف ان دا قمة الجمال ...

اذا لماذا كل هذه الضجة لأن البنت جت جميلة ...

وكل هذا التشاؤم لأنها مش حلوة؟؟؟

الجواب اننا نحن من صنعنا هذا التابو وعشقناه كمان وغنينا على ليلاه ....
احنا الل صنعنا وصغنا مفردات هذا المجتمع ولا نلومن إلا أنفسنا ..
الراجل من دول يبحث عن البنت الجميلة ويتاوى في ذلك المتدين مع اللي مش
يعني محدش يقولي المتدين بيدور على ذات الدين إلا من رحم ربي
والاصل في الامر الأهل برضه يعني كل أم نفسها تختار لأبنها عروسة شعرها اصفر وعنيها زرقا ...كأنها عروستها اللعبة اللي بتلعب بيها في صغرها
ما فيش واحدة فينا عندها ثقافة انها تختار على أساس الاخلاق الأول أو الدين إلا من رحم ربي برضه
حتى البنت مننا بقت تدور على كل سبل الجمال عشان تبقى مرغوب فيها وتنجح في كشف الهيئة
كل حاجة جربتها في بشرتها عشان تبقى ناعمة لما تيجي تتجوز واشي روج وماسكرا ومونا ورملة وزلط عشان نبقى أمرات في عين الننوس
والاكادة يا ابا العمدة أنه ميعجبش ويروح يدورلة على مودل تانيه ...
بهدلنا الحب معانا بعناه برخص التراب ..فاضل نرجع لأيام الجاهلية ونوءد البنت بس المرة دي لأنها وحشة
الح في ادينا كبنات ان احنا نرفض نتعلق في فاتارين ... انا بحافظ على بشرتي لأناه نعمة ربي ... وديعة من الخالق عز وجل يستردها متى شاء ...بحافظ على رشاقتي لأن السمنة خطر على هذا الجسد الوديعة من الله
وعشان اقدر اساعد الناس اللي حواليا ...ابقى خفيفة يعني ...
انا بحافظ على مظهري لأن مش ذنب الناس تشوفني لابسة احمر في فوشيا في بنبي في اصفر مش من حقى اأذي حد
والشباب ... بطلوا تيمة الجمال بتاعتكوا دي دوروا على اللي متربية عندها اصل عندها دين في بنات كتير روحها اجمل من شكلها تستحق لقب جمال الارواح -على رأي رفعت اسماعيل - مش لمجرد ان البنت جمالها على قدها نقوم الدنيا ويمكن امها تقولها شوفي البنات اومي حطيلك حاجة في وشك يمكن حد يعبرك
يا عاااااااااالم يا هوووووووووووه الجواز قسمة ونصيب - اللهم اجعل نصيبنا في الخير وارزق بنات المسلمين ازواجا صالحين-
البنات أميرات مش مانيكانات في الفاترينات
انتهى

أمثلة مهمة اكتبوها يا بنات

قاعدة الخزانة ولا جوازة الندامة
الندب بالتار ولا قاعدة الراجل في الدار - يعني من غير شغل - عاطل حضريتك يعني-
اللي يقول لمراته يا عورة ...يلعبوا بيها الكورة
واللي يقولها ياهانم يقابلوها ع السلالم
استهبل لحد ما اتمكن - الراجل قبل الجواز
اللي ما يحطكش كحل في عنيه ما تلبسوش شراب في رجليك
اطبخي يا جارية كلف يا الدلعدي
شوية أمثال للناوية تتهف في مخيخها يابننانيت وتتجوز

......عيد الأم... لازم نلغيه
....ولأني اهتم فكان لابد ان اتكلم عن عيد الأم
يوم 21/3 كان معروف عندي انه يوم تقطيع القلب
مع أن أمي الحبيبة ربنا يخليهالي يارب كانت جنبي يعني مش مسافرة.. أمال أيه الحكاية؟
الحكاية يا سادة وما فيها ... ان وانا في المدرسة كان ليا صاحباتي بنات أمهاتهم توفين وكان لمايجي عيد الأم نحتاس بيهم ونلف معاهم في العيادة في المدرسة
واللي تنهار واللي يحطوها على التنفس الصناعي مهزلة
وكان بيصعبوا عليا وكنت ببكي لما اسمع ست الحبايب يا حبيبة...واتخيل لو أنا اللي اتحرمت - يارب ما تحرمني منها أبدا- من أمي كنت شوفت الدنيا ازاي ؟
صحيح صدق اللي قال اللي بلا أم حاله يغم
لما كبرت حبة كمان يعني بقيت في ثانوي جدتي أم أمي ماتت ...وكانت صدمة شديدة لأمي خاصة أنها كانت بتحبها قوي زي ما انا بحب ماما قوي قوي
المهم حسيت شوية وقتها بطعم اليتم
كل ما كان يجي عيد الأم كنا بنحاول نخبي أمي علشان ما تسمعش أغاني الأم اللي بيملوا بيها التليفزيون
وبرضه ما فيش فايدة تلاقيها محاصرة ما بين الاذاعة والتلفزيون والناس اللي ماشية تدندن بيها
أنا ضد عيد الأم ... معلش خدوني على قد عقلي كده
.....واعقلوها .. خليني اقولكم ليه
- الأم كرمها الله سبحانه وتعالي في كتابه سواء منفردة أو في وصيه الإنسان بوالديه وحتى هذه الآية جاء بعدها تخصيص للأم، لأنها باختصار هي المعد الأساسي لأي جيل وبصوا كويس على فلسطين الأم بتجيب 9 عيال وهباهم لله مش عاوزة منهم غير اتنين بس
- صعب قوي ألخص حبي لأمي في هدية واحدة في يوم واحد يعني أطلع عينها طول السنة وبعدين آجي في يوم صغنون قوي أجيب لها هدية عبيطة قوي (انا جبتلها روماتيزم ولومباجو السنة دي )قال ايه بحبك يا ماما يا خي حبتك ناموسة مفعوصة
-المشاكل اللي بتحصل ومحدش ينكرها ويقولي حماتي ملاك -فينك يا مفقوع مرارتها - المشاكل تتلخص في : انت جبت هدية لماما السنة اللي فاتت مش قد كده الناس كلوا وشها ايه اللي جوز بنتك جابوهلك دا
طب ما انتي جيبتي لماما شال مينفعش مشاية حتى
انت حتجيب ايه لمامتي السنة دي يا حبيبي ؟ واحد عسكري يا حياتي أو عشماوي أحسن
دا غير ترتيب الزيارة : كل أم عاوزة إبنها أو بنتها يجولها الأول قبل الحما ..الأم زعلانة إزاي يروح لحماتو الأول طبعا ما هو ماشي طوع مراته...خايف يزعل الست الهانم أمها ألا تاخد على خاطرها ...زأنا أمه اللي ربيته ؟ خلاص اتركن ع الرف ؟
والبت المفعوصة اللي ما كنتش تعرف تعمل لنفسها كوباية شاي خلاص نسيت أمها؟ أمال فين انا صعبان عليا اني حتجوز واسيبك يا ماما دا أنا قدرش يعدي يوم من غير ما شوفك (أنا بقول لأمي كده على فكرة )راحت جري على حماتها اخص ع التربية وآداب كمان ولا تزعلي
دا جانب من المشاكل التي تحيط بعيد الأم
دا غير مشاكل تانية كتير بس أنا رافضة أعمل يوم لأمي
لأنها عمرها م فكرت تعملي يوم واحد بس في السنة تحتفل فيه بيا ... دي ع طول دلع وحب وحنيه لما الناس عطوها رمش محترم لا زالت تعبانة على أثره
طب ليه؟ هو ينفع يبقى في عيد للابن؟
مينفعش ماما تيجي تشقر عليا يوم في السنة وبعد كده أدي وش الضيف
أنا عاوزاهم يلغوا اليوم دا .. بلا عيد أم بلا عيد أسرة
وما فيش أحسن من الدين في الحواديت دي ..وصانا الله تعالى بوالدينا وبأمنا
ووصانا النبي - صلى الله عليه وسلم- بالأم ثلاثا
يبقى لزمتها إيه الغلاسة بقى و لا أحنا لازم نفتي وخلاص ونعارض المولى عزوجل
مش كفاية ذنوب حنضيف عيها كمان أعياد لم ينزل الله بها من سلطان ؟
ألغوا عيد الأم .. أعتقد أن الأمهات حترتاح وقتها
خليهم دايما على بالنا قد ما نقدر
و..خلص الكلام

.....الزواج

في عالمنا العربي تتلخص قضايا فكرية كثيرة تخص النسوة ،،،،في هذه الكلمة ... كلمة الزواج
في المجتمع العربي نقيضين
الأول تكلمنا عنه وهو من حاول أن يزج بالمرأة في كل شيء حتى يحولها إلى طبق لحم شهي .... يريدها أن تخلع عنها حياءها وأن تنافس الرجال أحيانا في أعمالهم ...
والجانب الآخر يدعي بعضهم التدين
وهذا يحرم كل ما جاء به الآخر- من باب الاحتياط-
هذا الفريق هو ما سأتكلم عنه اليوم
الفريق المدعي التدين وليس من المتدينين حقا
هذا الفريق درج أصحابه على تجريم المرأة في كل شيء
بدون أي مراعاه لظروف المجتمع ولا لظروف المرأة نفسها التي يصدرون بصددها الحكم (الفتوى)
هذا الفريق يفسر أحاديث النبي -صلى الله عليه وسلم -كما يهوى هو -
بدون الوقوف على زمن الحديث وأسبابه وشرحها للناس
حتى لا نسيء فهم احاديث نبي الأمة- صلى الله عليه وسلم-
بعضهم يوجب الزواج الثاني بلا أدنى مبررات ودون الوقوف على اسباب زواجه الآخر
فبعض الأزواج درج على هذه الفعلة فقط ليغيظ زوجته أو أنه فاشل في علاقته مع الزوجة الأولى ويريد أن يحملها المسئولية فيتزوج عليها ويدعي السعادة
او او الأسباب الوهمية كثيرة ...
الجانب المظلم أن هذا الفريق ينكر على المرأة أية حقوق في ظل إغراقها بالواجبات
ينكر عليها حقها في الذهاب إلى المسجد او إلى دار لتحفيظ القرآن
أنا هنا اتكلم بالأحرى عن الجانب المظلم وليس الجانب المشرق
فالمعتدلين لا غبار عليهم سواء من التيار السلفي أو الإخواني وهما تياران ممثلان للتدين في مصر
الجانب المظلم أن هذا الفريق ينسى أو يتناسى أن النبي- صلى الله عليه وسلم- كان طليق الوجه مع زوجاته ، وكان يسابق عائشة - أمي أم المؤمنين - الصديقة بنت الصديق
أي أنه كان يخرج بها للنزهة ، وكان يخرج بها في الغزوات، لم يحبس إمرأة قط ، لم يمنع ابنته أن تجير زوجها الكافر وهي مؤمنة وقدمت له الفدية حين أسر
هذا الفريق يلخص وجود المرأة في الزواج
يعني أن المرأة تفعل كل شيء خطأ وهي تفعله بدافع الحصول على زوج
-دا الرجالة اكتر من الهم ع القلب-
وفي نظرهم انها يجب أن تتوقف عن فعل ما تفعله من اخطاء لأنها لن توصله لشيء ، وأنها إذا التزمت المباديء والنصائح التي يقولونها سوف تحصل عى الزوج المميز الذي هو الحب كله والقلب الحنين والكبد والكلاوي
حتى أنهم يبثون تلك الدعاوى في ادمغة زوجاتهم حتى تراها تتكلم مثل هذا الرجل تماما عن فائدة المرأة في بيتها وعدم خروجها من المنزل لأن الذئاب تملأ الدنيا - ولو أني معاهم في الحتة دي - بس برضه احنا محتاجين برضه خروجها للعمل كطبيبة في تخصصات لا تصح للرجال أبدا كطبيبة ولادة وهكذا نرى ضرورة خروجها للتعلم باعتدال
واحدة صاحبتي من محفظي القرآن الكريم
راحت المسجد كانت لسه ملتزمة جديد لقت واحدة بتقولها :
إيه اللي انتي لابساه دا انتي لو قدامك بونبوناية مكشوفة حتخديها ولا حتاخدي اللي ملفوفة وتغطية وفي الفترينة ؟
قصة البونبوناية دي اتكررت كتير وهي تعني الزواج
أنا أرفض مثل هذه المهزلة وأدعو للاعتدال
بلا افراط او تفريط

تحياتي إلى غزة

ولأني أهتم ...
لحال النسوة في العالم العربي...
فلن أدعي أبداً ...
مثل الاخرين ...
أن لم اسمع صراخهن في غزة....
ما بين قتيل وجريح ...
تدفع غزة ثمن لخطأ لم ترتكبه...
تدفع أمهاتنا في غزة أولادهن..
وأزواجهن...
وأخواتهن...
ثمناً ....
لخطأ ..الرجال....
نعم ...
فحكام العالم العربي ...رجال
وحكام العالم أجمع.....رجال
والمعتصم كان رجلا غيركم يا رجال الوطن العربي...

يا أكذوبة تمشي على قدمين ...

يا مدمني الكلام ...

يا أكاذيب السلام ....

ارفعوا الرايات ...

واسكتوا الاقلام...

ارموا اسلحتكم ....

واعلنوا الاستسلام ...

والعنوا في سركم...

باسمنا ...

اسماءكم ...

واهدموا ...تماثيلكم

فهي كاذبة مثلكم...

واتركوا لنا ...

مناط الدفاع عن أرضكم ...

ولا تزعجزا نفسكم...

إذا سب نبيكم...

فقد ...أسري به..

إلى القدس..فلسطين

تلك التي تسعون إلى محوها..

من خارطتكم ...

يا خائنين ...أمسحوا دمعاتكم....

لا يهمنا كذب صراخكم...

ولا عويلكم...

لو تأسفون علينا لخرجتم بأسلحتكم...

ولكننا نموت كل يوم ...

بسلاحكم...

لا يهمنا ...

ان تخرجوا اقلامكم لتعلنوا لنا...

تضحياتكم...

فلو لم تكن لكم...

فائدة إذا فلغيركم....

من أسيادكم...

فلعنة الله على أسيادكم...

يا كل الشرائع الدولية ...

يا منظمة الملوخية...

أجيبي شعباً غارقا في العذاب

ستجدون اسمه مكتوبا عندكم في كتاب ...

اسميتموه كتاب الارهاب...

من يقتل الطفل الرضيع بلا حساب ...

ويهدم الابواب ...

ويمزق جلابيب النساء ...

ويقتل الاسرى وييتم الابناء...

بلا أسباب...

أو عقاب ...

اليس هذا هو الارهاب؟!!!

******

يا مقاتلي غزة الكرام..

لا تسمعوا صوت اللئام...

لستم المسؤلون عن موتكم..

بل هي الأوهام...

اوهام قوم اشتروا بعزتهم...

افيون السلام...

اصمدي يا كل ثكلى

فالقتيل وليدنا...

كما هو وليدكم...

والجرحى إخواننا..

كما هم إخوانكم...

اصمدوي يا غزة..

واحلمى يا حاملة راية العزة..

بفجر جديد ..

ورجل رشيد...

يعيد مجدك عما قريب..

شهداء غزة ..

ألم يكفيكم أن الله أختاركم للشهادة وأختارنا للهو واللعب؟

هنيئا لكم..

تقبل الله منكم شهدائكم..

طرزان على القهوة طلب ينسون.....وانا ممكن أبقى مأذون...........

مش بوقولكم ضايعين ...ضايعييييييييييييييين...
ما بين افراط وتفريط....
ناس عاوزينها تبقى مأذون....وناس عوزينها تبقى قاضي..
وناس عاوزينها تبقى كرسي مطبخ ...
اه والله في ناس نفسها تفجر نون النسوة وتلغيها من القاموس...
والأعجب ان الستات تصدق هذا الكلام عن تحرير المرأة في البرامج اللي زي هالة شو سابقا
مجموعة ستات فشلن في تحقيق استقرارهن في بوتهن
قوم ايه...تطل علينا ببرامج لهدم البوت المصرية تحت اسم حرية المرأة
تحت اي مسمى ممكن ندرج بند حرية المرأة في انها تكون مأذون
طب لو الكتب اللكتاب في المسجد ؟!!وهي حائض
مش حرام تدخل المسجد(...إلا عابري سبيل)؟!!
وهي هنا مش عابر سبيل وما فيش ضرورة تحتم عليها شغلانة زي دي
يعني تنتفي كل الضرورات التي تبيح لنا مثل هذا العمل
تحت أي بند تولى إمرأة قاض في ظل نقصان شهادتها...
تحت أي بند نحكم الستات .. اللائى تتحكم في حكمهن العواطف ؟
واحنا نعرف ازاي الراجل ممكن يعمل غسيل مخ للست من دول....
من امتى الست تبقى وكيل نيابة ؟ في ظل هذا الكم من المهازل التي تطالعنا كل يوم من اعتداء مجرمين على ظباط شرطة
ووكلاء نيابة؟
مين اللي قال دي حرية؟
الحرية التي يريدونها
ان تصبح المرأة مستباحة مثل طبق الأرز باللحم على موائدهم
مستباحة في شوارعهم
مستباحة وتحت الطلب للتعري باسم الفن والغناء
حتى تحولت المراة إلى مجرد غانية
والمحترمة كئيبة
والمتدينة ...وحشة
وكخ
أمال ليه بتوع حقوق المرأة مش بيناقشوا حق المرأة في انها تتحجب ؟!
يعني لما طلع عم الكتكوت وقال على الحجاب رجعية ...محدش طلع علينا يعني من بتوع حرية المرأة ؟؟
محدش هلل وطبل وزمر ليه؟؟مش دي حرية ؟؟ ولا أييييييييه؟؟
انا حرة ان محدش يشوفني لما البس نقاب... ليه بقى الضجة اللي حصلت وطلع عمك المفتي يقولك اصله لا فرض ولا فض وعبادة ....أمال ايه بتنجان ؟!ولاقهوة سادة؟؟
طب أمال ايه اللي عبادة؟ العري في المسلسلات والأفلام ؟ يعني العبادة فيلم حين ميسرة ولا هي فوضي؟
الحرية يعني اني انا اعمل اللي عاوزة تحت سقف الدين الذي ادين بيه .. واحترم قوانين البلد اللي انا فيها
حرية المرأة أن تحترم نفسها
ألا تصبح المرأة مجرد جسد يستهان ويستباح
مش دي الحرية يا بتوع حرية المرأة
حرية المرأة في التعليم الحر .. التعليم اللي يكفل لبنتي انها ما تقعدش جنب زميلها في المدرج لأن دا حرام
حرية المرأة في أنها لما تنزل العمل يكفل لها ساعات عمل محددة مش القطاع الخاص يبهدلها كيفما يحلو له
حرية المرأة إن الستات المنتقبات تحترم
الستات المحجبات تحترم
الست اللي عاوزة تطيع جوزها وتكمل معاه مشوار حياتهم صح تحترم
حيه دي حرية المرأة يا من صدعتم ادمغتنا بحرية زئفة ...

صباح الخير يا أحمد يا صباغ

تعليق جميل من أحمد الصباغ ...أشهر مدوني مصر ...
اتمنى أكون قد الكلام دا يا خالو أحمد ....
وعقبال ما نفرح فيك وتحصل خيخة ....
اتمنى أنك تتابع الجديد ....
مشكور والى الامام ......